NDUK-NDUK NUMPO TAMALO

17.37 |

ho duliu baradoa, kan banyoak nga talo ahengk. Dibanne uhuh umah nnak ahengk, kabanyakan sarudeu bee. Hee ilak asau talo ahengk. Kaluk idoak talo ahengk, paranang abih bibakeng kandek, ba-euk, simpo dan binatang laai. Adeileh keluarga usu kito inih duliu nga barada jageu, kaco dan ubek ahengk. Dibanne leh umang ahengk tadih. Lla nyei udoah umang, nyei lah balek kahengk. Dinding samantaro dibanne bee dingan tika buheuk. Bagasungk nye nyei alek ahengk Yei manang idoak alek ahengkleh, kandek nga ba-euk ibei tarrauh!

Sahi nyei balek ahengk itiuh, patto kiru uku limo, adeileh tamu, nteh sapau nteh, nak numpo talo. Takung ugei ayang tadih, mah mandah marayau. Masu duliu adei mandah marayau. Mandah marayau itiuh uho macurai; mala-malo nyei ibei. Dibanne nyuh sarupo antau nakung-nakung uho padahai nyei nak macurai. Dikteuk nyuh pintau kituh nyei nak numpo talo. Kaluk kito bukoak pinteu, kumoah nyuh. Di samp[ing itiuh adei pulo mandah sabingk. Mandah sabingk itiuh, siang ahai. Nyei nalik nannek nga marato ala sawoh atau ala sammok. Kaluk nyei suwo nna-nnek, dika-engk nyuh liyoi. Hii cangk, takung! Mmangk nye marato!.

Dek karno siyang ngalli uho tuo tadih nak numpa talo, ilak mpang parangai, mako dibeeileh tadih! Ibei umoah uho tuo tadih basanda-sande ka dindi. Ditaggeu ntai tapi idik lamo lah basande pulo nyuh. Apo kato tua-umoah: heh, kayo mmangk basande! Tiko jadi dindi itiuh idik nyei kuangk! Samantaro bee! Basande ugei tadih, hee barabbeuk kawoah, tampah palauk ka batiu dan mataaileh. Karno ahai lah malo, oleh uho umoah tadih dibungkuhleh mayat uho tuo tadih dingan tiko, dikabbengk ujung ka ujung, disande kek tanggei awoah.

Ahai tambah malo ugei. Anak uho umoah tadih ngamo bagiging ugei. Nga nnak tarruh ugei ngaaih, kada-kadeng galloak takika-kikeh. Ditaggiu di ayang wa indiuk, dakdei nyei nideng. Loh bagiging iko wei inih! Kato ayang. Inih ahengk inih! Adei imo, kandek, baruwou dan macca-maco leh binatang imbei. Antau banyoak pulo maccang! Adei antu uleu, adei antu sakannyok, antu tiho, antu rakikak-rakiki, antu jibala aboa dan macco leh! Jangan-jangan mandah marayau nga ibei saging! He abih bareng kituh diambuik nyuh! Kato ayang. Tapi anangk nga gaddoa idik basu ditaggeu. Snyangk nte, dicukoik nyuh pulo aduik nga nak tideu, bagiging pulo Lah puah nye ayang wa indiuk naggiu dakdei nye nyei nangngang.. Kiru-kiru uku sableh malo itiuh, iyei tiba-tibei tadangnge uho ngattuk pintau:

Antau : Nduk, nduk! Bukoak pintau! Nduk, nduk! Bukoak pitau!

Tua Umoh : Sapau !

Antau : Nduk, nduk! Bukoak pintau! Nduk, nduk! Bukoak pitau!

Numpang tamalo!

Tua Umoh : Kamai banyoak uhang umoah, Dik muangk tampaik!

Antau : Kah pintau mbeuh ugei kamai tideu!

Tua Umoh : Pnoh nye kamai umoah! Kloi basusun uho tideu umoah!

Kamai kan gotong-ruyong sahai tadih, banyoak nye uhang!

Duu puluh uho adei umoah. Janta-janta gaddou!

Anangk uho umoah itiuh nga baruwei tadih, abih nga-a-nga-auk. Antau hah nak kumoah. Hii aku takung! Kato ayang. Bagiging dan nangaih ugei ala imbei tngah malo! Dangnge antau nteh mandah marayau lah tibei! Uho nga nak numpo talo itiuh yei mandah marayau nye, duwu uho. Kaluk dibukoak uhuh pintau, nyei dapengk kumoah, cubeileh. Kada-kadeng yei tideu nyuh duliu nunggu uho umoah takallangk tapi kada-kadeng langsung nyei ngancam uho umoah nga paho dan abih bara-bareng diambuik nyuh. Barengleh nga abih agi unta, tapi kaluk nyawo dipupeuk nyuh pulo, apo jih? Didangnging nyuh uho umoah ngato banyoak uhang, mako katakung nyuh leh. Dalam padu itiuh adei nyei nangngang uho umoah parabe:

Binui : Wo! Bareng nga bekabbengk panjoa tadih, adei awok

moo kumoah?

Lakoi : Asau bareng lah akuh beei galeu tadih!

Binui : Dakdu mpa-mpang bara panjoa itiuh. Cubei kalloi! Mano?

Lakoi : Yei nye dakdei?

Binui : Dakdei nye! Kaluk diambuik uho yei rugi nye kito. Barang

mmah, sing, aleng itiuh. Alau ambek kawoah! Tasande ka

dindi yeng!

Lakoi : Wah, akuh idik tangngo. Pagi isak bee leh!

Adeileh mandah marayau, uho pancurai baruwei tadih nangngang uho umoah parabe. langsung nyei uwei naloik dan dapengkleh barang tadih dkek ka tanggei. Diambek barang itiuh, ditikung nyuh, suho mamukei dan suho karako. Dibeeileh bajala tangkah ala gallengk malam itiuh. Sambi barahi, apo kato nga mamukei: Yei balabu gaddoa nye kito sakalai inih! Kayo nye kito! Yei, kato nga karako. Harus kito bagi duweu barang inih! Yei lleh! Kato kantoi nga mamukei.

Bajaloa, bajaloa tarruh, nteh kano nteh. Pokoknye jeeuh dari uho, nak babageh hartu karun tadih. Puku limo pagi ahai mulai tarro. Nampokleh dek nga karako ngalli baya-bayeng kaki uho tajuleu ata aleng bungkusan nga ditika tadih. Apo kato nyei: Barangkali uho nga kito beei inih. Mano uho? Kato nga mamukei. Mma batambah kanco nyei bajaloa. Nga karako ntu kanco pulo. Lah uku limo satangngoh, lah tra iyeh ahai. Jalleh nye nga karako ngalli kaki uho tajuleu. Soh uho nye nga kito tika inih, kato nyei. Uho? Mma batambah barahi nga mamukei! Idik tallok nga karako nuhungk agih, mako dilappehleh barang tadih. Pio kaau marappeh! Kato nga mamukei sambi mangngaih! Kloi hoh! Nga kito beei inih bangki uho! Dikloileh tadih, kiro iyei bangki uho nye. Takicahleh nyei uwei tadih. Macurai ugeileh! Awok llah mpak samala-malo nikung bareng, balabei nye asau, apo …… sakunung lah abih….

Uluk Ngoh, 17 Juli 2004

***

Comments 0

BARAMU BILEK

17.36 |

anyoak nannek nga panuhauk, nuhungk ayang atau indiuk. Titung puloleh kabarnye anak janta nnak nga dalam carito inih. Sapau gleng anak inih, ntohleh, tapi uho ngimbeu nyei Bujang Panuhauk. Umur nyuh kiru-kiru tujuh taau leh. Sangat nye nyei panuhungk ayang. Pagi-pagi lah diintai nyuh ayang nak ging ka sawoh atau kahengk. Kada-kadeng dikicah uhuh manno, dikato di indiuk ayang agi kayek duliu. Kaluk ayang ibei awoah, sannya-sannyangk diula leh di indiuk bareng ayang, karimpo, jak ka singangk. Kaluk takicah nining, he bahiya-hiyeng nyei nangaih, dihimbengk nyuh umoh nga batiu samu nyabbungk namu ayang wa indiuk. Titung nannik duliu mangngaih. Mining agi nannek ngimbengk umoh, samu nyabbungk namu ayang wa indiuk?.

Nga sahai itiuh uho nak kahengk gutong-ruyong ngambik pamung. Uho nak manno bilek, bilik padi. Uho nak nabbou ahengk, nabba batang kayau. Karno itiuh uho ndoak nye moo anak tadih kahengk, takung ditingkah kayau. Tapi yei, lah puwah uho minaik, nyei ndoak nye tinggoa. Mako dibeeileh Ujang tadih. Ibei ahengk ditok uhuh nyei umoah, umah nnak. Mmangk nye kaau kawa-kawoh! kato ayang nyuh Uho nabbou, kaluk ditingkang nyuh mpa dakdu ampun agih. Matai! Jadi ugiuleh nyuh umoah tadih nyei uhang. Kada-kadeng ugui nyuh we tanto nglli uho banyoak tadih gawe.

Nga pagi lah sarasso uho nabbou, tapi adei kayu nga gaddoa nga lla beres. Udoah mako, uho ging pulo nabboa. Katiku kayu gaddoa itiuh boah, knu tingkoh leh ayang nyuh. Tok palauk dan matai. Panikleh uho. Bagasungk uho nguraih, palauk dikbengk uhuh dinga uto, ditamok aleng kii saha, langsung digotong samo-samo balek usiu. Karno karupang, mako tinggouleh Ujang tadih ahengk. Uho lah ibei usiu, lah malo ahai dakdei ugei uho tino anak nnak tadih tatinggou. Maklumleh uho panik.

Adeipun Ujang nga tinggoa ahengk tadih, lah uwah baimboa, dakdei uho nga nyawengk. Ahai lah malo, nak nangaihpun takung. Pioleh uho ninggoa akau! kato nyei ala atoi. Uho nak munuh akau! Disaangkleh pintau dan tideu. Mano mbeuh nyuh takallangk, asau imo lah tibei bee nak makang awok. Hek aleh, mmangk nye panuhuk, kato nyei ulo ala atoi.

Dalam padu itiuh, kiru-kiru uku duu balleh malo, ibeileh uho ngattuk pitau. Ujang! Bukoak pintau, bukoak pintau! Knok bajiu lakkah, mmoh kito balek usiu! Takanjengk Ujang, ditasangkleh: sapau awoah itiuh? Pio ibei tangngah malo? Akau Jang, ayang kaah. Lakkah bukoak pintau, kito balek mining l;eh! Idik parlu akau kumoah! Dek ayang nga ngimbeu, patuhleh anak tadih. Knok bajung, langsung kuwoi dan truhleh balek. Bajaloa ala gallengkleh tadih. Suleu dakdei tapi ahai tra-tra sabeuk. Nyei mamukei ayang balakou. Idik jeeuh bajaloa tadih, lah manyanyi uho nga karako: