|
A
|
deileh satu
keluarga, terdiri dari ayang, indiuk, anak tinei suho dan Ninau. Nga Ninau inih
lah tuo, lah malah nye talo mpak anak-cucung nyuh. Nyei agak nyinya, malah nyuh
mpak uho. karno itiuh talo nyuh umei. Apo leh
gawoi nyuh umei itiuh yeileh nguraih plok, plak nik. Nga ditanang nyuh cabe,
sayu pucuk ubi, battek, sayu manih, kacang panjoa, yei serba dikingk leh. Umpu piso adei ugei
nyei naheu karaku umoh. Nga gawoi nyuh
nye ngidungk ayo. Banyoak ugeileh ayang nyuh.
Adaipun cucung nyuh nga tinei tadih kiru-kiru umur nan
taau leh. Nyei suko nye kumei kiniuk mah ninau nyuh. Kadeng-kadeng talo nye
nyuh umei mpak ninau. Sayang nyuh nye ngusi ninau. Padu satu kesempatan uho
parre sakuloh, nyei ngango ngabih waktu parre itiuh umei mpak ninau. Udoah nyei
ngato ngusi indiuk wa ayang, barangkekleh nyei
kumei.
Apo gawoi nyuh
umei tadih, yei nulung ninau tanok, nyabungk umpauk, mangkingk cabe, ngambik
sayu dan laai-laai. Ptang ahai bagasungk nyuh masak ayo dan pagi-pagi dilpeh
nyuh dan dibageh mako. Katiku itiuh karmengleh ninau nyuh. Dakdei nyei
ngato-ngato ka uho, ka cucung idoak ugei nyei ngato. Sahai bahu nyei karmeng
lah sakik taramaauk. Kiru-kiru uku mpangk pto mataileh ninu tadih. Cucung dakcok
nyei nyauk. Kato nyei ninau nyuh tidu biasei bee.
Yei lah patto ahai ahi itiuh. Cucung pun mulai ngiso ayo supayo
masak aleng beng, awa umeng. Magringk lah masak, ahai lah glengk tapi ayo mano
nga masak mano nga lahai pulo kuwoi. Diiso nyuh pulo tapi titung ugei:
masak-kuwoi, masak kuwoi. Malah akhir nyuh batarbeng aya ninau tadih. Pio leh
ayo lah abih gilei pto inih, kato nyei ala atoi. Nyei lah mpak ahai lah makin
gallengk. Mako diimbeu nyuh ninau, mintak tula.
Cucung : Nau,nau! Bangkingk! Ayo ndak asak ,nau!
Ninau : ? Snyangk bee, dakdu ungu-ungi.
Cucung : Nau,nau! Ayo ndak asak, nau! Tula aku, nau!
Ninau : Nou,nou! Oyo ndok osok, nou! Tolo okou, nou!
Cucung : Nau, nau! Bangkingk lkah !
Tula masak
ayo nau! Kloi ayo
batarbeng nahoh. Ahai lah malo!
Ninau : Nou,
nou! Bongkingk lkoh!
Tulo mosok oyo nou!. Kloi
oyo botarbong
nohoh. Ahoi loh molo!
Cucung : Nau, nau!
Pio awok mama-amek! Tulaleh.
Kloi ayo batar-
beng nahoh,
inih nga masak inih nga lahai.
Ninau : Nou,
nou! Pio owok momok! Tuloloh. Kloi oyo botorbeng
nohoh, onoh ngo
mosok onoh ngo lohoi.
Tapako cucung tadih. Nyei lampak, ahai lah glengk, ninau mamamek
ugei. Moh akuh nak ngalloi ninau akuh, apo gawoi nyuh umoah. Nyinjek leh nyei
ngalloi kah dindi parupah, Apo ninau dudeuk sedang nasah kukeu. Jleh nye nyei
ngalloi, ile panja-panja kukeu ninau nyuh itiuh. Heran nyei, pio ninau panjoa
kukeu. Satahu nyei idoak titung. Diimbeu nyuh ata awoah. Nau! Apo gawe itiuh?
Pio awok nasah kukau? Nyawengkleh ninau: Opo
hoh? Pio koou mongngoih akou nasoh kokou hoh? Dikloi nyuh balek dari
tkuk dindi tadih, apo ninau lah taggoak, laai ulo mpang. Ambungk panjoa bagirai
sampo ka lanto, matau aboau gaddoa, taringauk panjoa ulo, gigui kunai sagadda
pisawwai Mah barahi mapulangk nyuh lahai. Ngallah nyuh karako, yei lah ngajje
mpang . Mako batambah barahi-tangkah nyuh, sambi makkak mintak tula: tulaa,
tulaaa! Dakdei nyei taau ahai malo, jaleng dabbeh, takuha-kuhak, pokok nye
barahi. Ibei umoah lah pinso idik sadar.
Ngalli anangk balek sangnga-sangngeh, malah idik sadar agih malo
itiuh, heranleh indiuk wa ayang. Pio kaau, pio kaau!, kato indiuk wa ayang.
Dakdei nyei ungi. Adei sapuluh manningk nyei sannyangk bahu nyei sadar.
Dsicaritoleh tadih tentang caritu “ayo batarbeng ndoak asak, nyei dikjoi
ninau”. Idak lupo pulo dicarito bahwa ninau lah dua ahi tideuleh gawoi, kuro
nyei mako dan manang mpang ninau nga
dikloi nyuh pto itiuh.
Udoah nangngang ciritu anangk tadih, diimbeuleh babarapu uho keluarga dkek, nga janta-jantou.
Barangkekleh kumah ninau tadih paki suluh duwu nannyo suwih suhang. Ibeileh uho
iniuk kiru-kiru uku sableh malo. Dikloi pintau tabukoak, dan namnpokleh tngh
umoh ninau taguli lah mataai. Malo itiuh
ugei dibeeuleh mayat ninau tadih ka usiu.
Hoo, kato anangk nga di kajji ninau tadih: sapau nga ngajji akau
itiuh, ayoh? Ninau kan lah matai! Kato ayang: Antu ninau! Hiii, aku takung!
Kamboa nye bulu badou akuh! Sila agui akuh ndoak agih tideu mpak ninau, kato
nyei. Gallak sngung indiuk wa ayang tadih. Manang kaau nak tideu mpak ninau
agih, nyei lah matai! Kato indiuk. Titung
leh tadih caritu inih. Dek ninaulah matai , abihleh sakunung ayo ndak asak
inggu iniiiih……
Uluk Ngoh, 12 Juli 2004
***
0 komentar:
Posting Komentar