|
B
|
aeuk adeileh binatou nga kasumbong-subong dan pancameeh. Cubei kloi nyunyung nyuh, nak
nyibi uho bee mpang. Lanco nye nyei nyibi uho. Dihi nyei manang mpang, dakcok
nyei nyauk. Buhingk nyuh tajungkiu, aboa, kato uho duliu mpang sabu rau mpang. Sabu rau, sabun harum, sabu
mandi. Ngambe uho barusei, dak? Titung leh ba-euk, nyangngui uho bee gawoi
nyuh. Barusei dakcok nyei nyauk, nyei dakdei ngaji. Mmangk niru baeuk, yeh! Kaluk kito panyibe,
dikato uhuh sarupo dinga ba-euk, dakdu ngaji nga siyou!
Hebatnye
ba-euk itiuh, adei pulo. Baladoa idoak tapi saluruh ladoa nyeileh nga tuang.
Taung uhuh, kaco, timau, slu-tinggi dan laai-laai nga ditanang uhuh, diambuik
bee nyuh. Mah adei nyei mintangk ka tuwang leh! Kaluk diiso uhuh lahai ata ala
ladoa, dicangngui nyuh uho duliu, bahu nyei lahai. Iko aji kahengk suwo
baeuk? Cubei pulo kloi, kada-kadeng tibei bee gileu nyuh, mata-matai
ranting kayau dintu tujung. Paranang uhuh: kawo, kulak-anaih dan apo bee lleh,
ilak bee nyei matai. Pio itiuh klah? Acok iko nyauk sabbengk? Dnge mah akuh
nyarito ngusi iko!
Pado satu
ahai, udoah ba-euk ngambik paranang uhuh, nyei ugiu ati umpu kayau sambi
ngunya-ngunyoh. Apo nga dikunyang nyuh? Cubei
takkoi? Babidei dinga binatang laai, ba-euk acok nyimpang makanan di liyoi
nyuh. Kaluk liyoi nyuh gambeu, yei makanan isoi itiuh. Taa, kaco, timau, ubek,
lanco nyei ngattok ala liyoi duliu. Lah pannoh liyoi, bahu nyei ngambuik nak
makang. Tapi barapeu nye leh muatan lijoi itiuh, idoak ugei sampo saambeu atau
saguni, dak? Tapi kaluk manusio mancurai ntu labbeh pulo dari ba-euk. Uyou atau
guni dibeeu nyuh. Abih nye paranang uhuh.
Jadi
ba-euk ngunya-ngunyoh itiuh yeileh makanan nga adei ala liyoi dikaruwo nyuh balek. Dikunya-kunyang nyuh
duliu sablum nyei nallang. Sambi ngunyoh ati kayau tadih nyei ngallah kaweng ka
padang lalo.
Lamo nyei muno ngalli lalo. Duwu kayu laai dakdei nga saunci duwu lalo.
Sapauleh nga nguncing duwu lalo inih? Kato nyei ala atoi!.Idik tapika di nyei. Akhirnya
kato nyei: hoh inih jadi bahan satakking akuh dingan kanca. Kanca ngato nyei
caddek bee, cubeileh inih pasti dakcok nyei nyawengk.
Marumpangk
dan marumpangkleh ba-uk tadih dan suwoleh nyuh dingan kanca. Haa inih nyei
kanca, kato nyei. Diimbeu nyuh leh:
Ba-euk : Nca! Nca! Mmangk lahai! Kiningk mpa!
Kanca : Haa pio? Adei apo?
Ba-euk : Dka-dkek iningk
nahoh. Akau adei satakking, cubeileh jawengk kaluk kaau acok, kaluk yei mpa
caddek!
Kanca : Kaluk
mpak akau dakdei nga
payoh, Euk! Cubei kato, apo
satakking mpuh
itiuh?
Ba-euk : Duwu lalo sapau nga nguncing? Jawengk Nca!
Kanca : Mpa
nga bangei, akau
nga kaau tasangk!
Mudoah nye
jawengk itiuh Euk!!
Ba-euk : Kaluk mudoah, cubei kato!
Kanca : Mangngaih leh kaau kaluk aku kato jawengk!
Ba-euk : Mpa dakcok jawengk, mpa kato akau mangngaih!
Kanca : Samudah
angai, Euk! Idoak
nye kaau mangngaih
kaluk
aku kato jawengk?
Ba-uk : Pio ulo akuh mangngaih.
Kanca : Kaluk
kaau bakaang nye
yei akuh jawengk, tapi mmangk
nye kaau mangngai!
Ba-uk : Idoak akuh mangngaih, jawengk leh!
Kanca : Buhingk kaau abou, sapau nga ngabeng, Euk!
Nanngngang
jawaban kanca tadih, mma mangngaih bauk tadih. Barahi nyuh kaweng ngajji kanca.
Kanca kanco pulo barahui, idik dapengk baeuk ngajjoi. Dek karno itiuh idik
lappah mangngih ba-euk. Lahai leh ba-euk moo ati panah.Raso manngngaih tadih
dilappeh nyuh kah nga laai. Manjengk nyu kati umpu kayau balek, mma
dipata-patai nyuh ranting kayau, kayu apo bee.
Sampo mining, kaluk nyei tino parabi kanca, nyei tetap marappeh
pamangngi, mata-matai ranting kayau, malah nyabungk umpun apo bee nga nyei
suwo: taa, cabe, timau, ubek, kaco, bawoa dan laai-laai Titungleh parangi baeuk sampo mining, uho
batano, nyei nyabungk. Itiuleh mako uho baradoa talo ahengk ngantoi paranang
dan habihleh atau sarassoleh sakunung inih ….
Uluk Ngoh, 13 Juli 2004
***
0 komentar:
Posting Komentar